Quyida keltiriladigan hadis, fikrlar va hikmatlar saytlardan va ijtimoiy tarmoqlardagi turli sahifalardan olib tarjima qilingan.

Rasululloh sollallohu alayhi vasallam dedilar:

«Besh narsadan oldin besh narsani g‘animat bil:

Qarishingdan oldin yoshligingni;

Kasal bo‘lishingdan oldin sog‘lig‘ingni;

Kambag‘al bo‘lishingdan oldin boyligingni;

Band bo‘lishingdan oldin bo‘shligingni;

Vafotingdan oldin hayotingni».

*****

Iymon eng buyuk ne’mat. Iymonli holda yashash eng buyuk hayot. Iymonli holda o‘lish eng baxtli holda o‘lishdir. Ammo iymonli holda o‘lish uchun iymoni taqozo qilgan tarzda yashagan bo‘lish kerak.

*****

Qalbdan chiqqan narsa qalblarni teshib o‘tadi. Til uchida aytilgan so‘z esa, quloqdan nariga o‘ta olmaydi.

Hasan Basriy rahimahulloh

*****

Kim Allohdan qo‘rqsa, Alloh o‘sha bandasidan hamma narsani qo‘rqadigan qilib qo‘yadi.

Hasan Basriy rahimahulloh

*****

Mo‘mina ayolning pardozi

Bir mo‘mina ayoldan pardozlanish uchun nimalardan foydalanishi haqida so‘radim. Quyidagicha javob berdi:

«Rostgo‘ylikni labim uchun, Qur’onni ovozim uchun, rahm-shafqatni ko‘zim uchun, ehsonni qo‘lim uchun, istiqomatni barcha a’zolarim uchun, Allohga ixlos qilishni qalbim uchun ishlataman».

*****

Ajib odamlar orasida yashayapmiz.

Birovning haqidan qo‘rqmaydigan kimsa omonatdorlik haqida gapirsa!

Xoin kimsa xiyonatning zararlari haqida gapirsa!

Qo‘rqoqlar shijoat haqida asarlar yozib, she’rlar bitsa!

O‘g‘ri, poraxo‘r, sudxo‘rlar halollik haqida va’z o‘qisa!

Behayo, yarim-yalong‘och, betgachopar ayol-qizlar iffat, uyat, ibo, muloyimlik haqida gapirsa!

Zolimlar adolat haqida nasihat qilsa!

Tashqi ko‘rinishida, yurish-turishida, hayot tarzida ma’naviyat, ziyoning asari yo‘q kimsa ma’naviy yuksalish, axloqiy fazilatlar haqida nutq qilsa!

*****

Insonlar qilgan yomon ishing sababli o‘tmishingdagi barcha yaxshiliklaringni unutadilar.

Alloh taolo chin tavbang sababli o‘tmishingdagi barcha yomonliklaringni kechiradi.

«Xovatir roqiya jurnali»

*****

Kim bir soatlik mashaqqatga bardosh bermasa, bir umr jaholat xorligida qoladi.

Asma’iy

*****

Bolajonim, sharaf, ba’zilar o‘ylaganidek, faqat jasadda bo‘lmaydi. Balki sharaf so‘zlarda, va’dada, amalda, muhabbatda ham bo‘ladi.

“Tarix muhrlagan so‘zlar”

*****

Muvaffaqiyatli shaxsga hujum qilish o‘rniga undan-da muvaffaqiyatliroq bo‘lishga harakat qil! Hasad bilan havas o‘rtasidagi farq shudir.

 “Tarix muhrlagan so‘zlar”

Internet materiallaridan to‘plab, tarjima qiluvchi

Nozimjon Iminjonov