Joriy yil Haj mavsumida hojilarga qulaylik yaratish maqsadida Mino vodiysida ilk bor baland chodirlar o‘rnatilishi rejalashtirilmoqda. Bu o‘z navbatida ziyoratchilar sonining ortishiga va turli noqulayliklarning oldini olishga xizmat qiladi. Bu haqda islam-today.ru nashriga tayanib "Islom.uz" portali xabar beradi.
Har bir chodir sakkiz kishiga mo‘ljallangan bo‘lib, chodirlar olovga chidamli materiallardan tayyorlangan va ulardan foydalanish juda ham qulay. Maxsus dizayn asosida tayyorlangan chodirlarni yig‘ish va olib tashlash juda oson. Bu esa tashkilotchilarning ham ishini yengil qilishi aytilgan.
Mazkur chodirning birinchi qavati uy xodimlariga va oziq-ovqat mahsulotlarini saqlash uchun ishlatilsa, yuqori qavatlarda ziyoratchilar yashaydi.
O‘zbekiston musulmonlari idorasi Matbuot xizmati
Yaqinlashib kelayotgan muborak Qurbon hayiti ayyomiga munosib tayyorgarlik ko‘rish maqsadida Surxondaryo viloyatidagi barcha qabriston va ziyoratgohlarda umumxalq xayriya hasharlari yuqori uyushqoqlik bilan tashkil etilmoqda.
Mazkur savobli tadbirlarda diniy soha vakillari ham alohida faollik ko‘rsatib, o‘zlarining munosib hissalarini qo‘shmoqdalar.
Joriy yilning 23 may kuni viloyat hokimining o‘rinbosari hamda viloyat bosh imom-xatibi Rasuljon domla Abdullayev Jarqo‘rg‘on tumanidagi “Ma’rifat” mahallasida joylashgan “Mullo Hazrat” qabristoniga tashrif buyurdilar.
Mutasaddilar u yerda olib borilayotgan tozalash va ko‘klamzorlashtirish ishlari jarayoni bilan yaqindan tanishib, hududni yanada tartibga keltirish hamda ziyoratchilar uchun barcha zarur shart-sharoitlarni yaratish bo‘yicha mas’ullarga tegishli tavsiya va ko‘rsatmalarni berdilar.
Bu kabi xayrli hashar tadbirlari ayni paytda viloyatning barcha shahar va tumanlarida qizg‘in davom etmoqda.
O‘zbekiston musulmonlari idorasi
Surxondaryo viloyati vakilligi
Matbuot xizmati