Tarixan qisqa davr ichida, mustaqillik yillarida o‘z kuchimiz va salohiyatimizga tayangan holda muqaddas qadriyatlarimizni, tilimiz va dinimizni qayta tiklab, bugungi kunda har sohada har tomonlama mustaqil taraqqiyot yo‘lidan rivojlanib borayotgan erkin, demokratik davlatga aylandik. Ma’lumki, tinchlik Alloh taolo tomonidan butun insoniyatga in’om etilgan eng ulug‘ va oliy ne’matdir. Muqaddas dinimiz ham tinchlik tushunchasini o‘zining bosh g‘oyasiga aylantirgan, desak, xato qilmaymiz. Alloh taolo Qur’oni karimning “Baqara” surasida bayon qiladi: “Ey iymon keltirganlar! Barchangiz yoppasiga tinchlik ichiga kiringiz”. Islom dinining ikkinchi manbasi bo‘lmish Payg‘ambar (s.a.v.)ning muborak hadisi shariflarida: “Tinchlik va xotirjamlik ikki ulug‘ ne’matki, bundan ko‘p odamlar bebahradirlar”,- deyilgan. 

Haqiqatdan ham Alloh taoloning bu ne’matidan hamma ham barobar bahramand emas. Barchaga ayonki, dunyoning turli burchaklarida terrorchilar tomonidan nohaq qon to‘kishlar sodir etilmoqda. Islom dinini niqob qilib, o‘zlarining g‘arazli maqsadlarini amalga oshirayotgan tuban kimsalarga qarshi doimo sergak va hushyor bo‘lish zarur. Zero, Qur’oni karimning “Moida” surasida: “Ezgulik va taqvo (yo‘li)da hamkorlik qilingiz, gunoh va adovat (yo‘li)da hamkorlik qilmangiz”, deb marhamat qilingan.

Mustaqillik sharofati bilan xalqimizning ma’naviyati va milliy qadriyatlari qayta tiklandi. Mustabid tuzum davomida qatag‘on qilingan yuzlab yurtdoshlarimiz, vatanimizning fidoyi farzandlari xotirasi abadiylashtirildi. Eng ulug‘ va eng aziz – Mustaqillik bayrami yaxshilikning umri abadiy ekanligi haqida o‘ylashga undaydi. 

O‘zbekiston Respublikasiining marhum Birinchi Prezidenti I.A. Karimov: “Biz uchun bebaho boylik – tinchlik va osoyishtalikni, jamiyatimizdagi mehr-oqibat, fuqarolar va millatlararo totuvlikni ta’minlash,uni ko‘z qorachig‘idek asrab-avaylash har doim diqqat-e’tiborimiz markazida turishi lozimligini aslo unutmasligimiz kerak”, degan edilar. Darhaqiqat, qaysi bir yurtda tinchlik va osoyishtalik hukm surar ekan, o‘sha yerda taraqqiyot bo‘ladi. Biz erishayotgan yutuqlar zamirida ham ana shunday tinchlik va osoyishtalik yotadi. Mustaqillikning o‘tgan yillariga nazar tashlasak, poytaxtimiz, barcha viloyat hamda shaharlarda, qishloqlarimiz, hatto yurtimizning chekka hududlarida ham katta o‘zgarishlar ro‘y berayotganiga guvoh bo‘lamiz. Yurtimizdagi xotirjamlik va barqarorlik tufayli xalqimizning har kuni to‘yu-tomoshalar, bayramu shodiyonalar bilan o‘tmoqda. Bu ne’matlarga chin ma’noda shukrona qilish va ularning qadriga yetish kerak.

Mustaqilligimizning dastlabki yillaridanoq jamiyatimizda xavfsizlik va barqarorlikni ta’minlash, fuqarolarning tinchligi hamda osoyishtaligini asrash asosiy vazifalardan biriga aylandi. Shu ma’noda xalqimiz tinchlikni yuksak qadrlaydi, uni orzu-intilishlari va ezgu niyatlari ro‘yobining muhim kafolati deb biladi. 

Darhaqiqat, dinimiz ham tinchlikni, mustaqillikni bebaho ne’mat deb ulug‘laydi. Shuning uchun ham Qur’oni karim oyatlarida ko‘p bora tinchlikka da’vat etilgan. Alloh taolo shunday marhamat qiladi: “Ey iymon keltirganlar, yoppasiga tinchlik ichiga kirishingiz”. Tafsir kitoblarida keltirilishicha, ushbu oyat bir tomondan barcha insonlar ahillikda tinchlik yo‘lini tutishlari kerakligini anglatsa, ikkinchi tomondan esa uni barqaror qilish uchun barcha hissa qo‘shishi zarurligini bildiradi. Mustaqil, tinch, osoyishta, har kuni xursandchiligu to‘y-tomosha bo‘lgan yurtda yashash esa katta baxtdir. Alloh taolo yurtimizning mustaqilligi va tinchligini bardavom aylasin. 

“Jo‘ybori Kalon” ayol qizlar o‘rta maxsus

 islom bilim yurti ma’naviyat va

 ma’rifat ishlari bo‘yicha mudir o‘rinbosari Roxat Mamadshoyeva