Toshkent shahri Yunusobod tumanida joylashgan “Hasanboy” jome masjidi hududi kuni kecha ilohiy rahmat nurlari bilan limmo-lim to‘ldi, desak sira mubolag‘a bo‘lmaydi. Sababi, bu fayzli jome masjidda kecha tarovih namozida o‘qilayotgan xatmi Qur’on yakuniga yetdi. Xatmonaga tashrif buyurgan Shayx Abluaziz Mansur kabi taniqli ulamolar, Rahimberdi domla Rahmonov, Abduhakim qori Matqulov, Isoqjon domla Begmatov kabi tajribali imom-domlalarning ta’sirli mav’izalari mo‘min-musulmonlarimizni yanada ixlosli bo‘lishga undadi. Shuningdek, qorilarimizning husni sovt bilan Qur’oni karim tilovat qilishlari namozxonlarning qalbini ilohiy muhabbatga ko‘mdi.
“Hasanboy” jome masjidi imom-xatibi Abdumannon domla Usmonov boshchiliklaridagi masjid jamoasining xatmonaga puxta tayyorgalik ko‘rgani xatmi Qur’onning yakunini chiroy o‘tishi va kishilarga a’lo kayfiyat ulashishiga juda katta omil bo‘ldi.
Bularning barchasi Yaratganning inoyati va marhamatidir. Shuning uchun bunday kunlarning qadriga yetish, asrab-avaylash va shukrona keltirish lozim.
Toshkent shahri Yunusobod tumanida joylashgan “Hasanboy” jome masjididagi tarovih namozidan tayyorlangan ushbu fotolavhalar yuqoridagi aytilgan so‘zlarimizni tasdiqlaydi.

O‘zbekiston musulmonlari idorasi Matbuot xizmati