O'zbekiston musulmonlari idorasi raisi o'rinbosari Muhammadolim Muhammadsiddiqov boshchiligidagi Diniy idora mas'ul xodimlari Termiz shahridagi “Imom Termiziy” o'rta maxsus Islom ta'lim muassasasiga tashrif buyurdi. Ularga Surxondaryo viloyati bosh imom xatibi Aliakbar domla Sayfiddinov va bilim yurti mudiri Muzaffar domla Jabborov hamrohlik qildi.

Diniy idora mas'ul xodimlari dars jarayonlarini kuzatib, ta'lim sifati va o'qituvchilar ilmiy salohiyatini ko'tarish, diniy ta'limda an'anaviy va zamonaviy pedagogik texnologiyalarni qo'llanilishiga doir takliflarni bildirdi. Shuningdek, ustoz va talabalar fikr-mulohazalari ham tinglandi.

Tashrif davomida soha rahbarlari ta'lim muassasasi o'qituvchi va talabalari bilan muloqot o'tkazdi. Unda so'zga chiqqan notiqlar o'qituvchi va talabalarning mas'uliyatini oshirish, ilmning fazilati, imomlik sharafi, mashaqqatlari, diniy sohada bilimli va dunyoqarashi keng kadrlarga bo'lgan ehtiyoj kabi masalalar yuzasidan fikr almashildi.

Shuningdek, madrasa bitiruvchilarining yurtimiz masjidlari va diniy ta'lim muassasalariga ishga taqsimot qilinishiga oid masala muhokama qilindi. O'rta maxsus ta'limdan keyin o'qishni davom ettirmoqchi bo'lgan talabalar yurtimizdagi  3 ta oliy diniy ta'lim muassasalarida bakalavr, so'ng Toshkent islom institutida magistratura va doktorantura bosqichlarida tahsil olishlari mumkinligi aytib o'tildi.

Ma'lumot uchun, Prezident Shavkat Mirziyoev 2019 yil 17-18-oktyabr' kunlari Surxondaryo viloyatiga tashrifida bergan topshiriqlari ijrosi yuzasidan 2020-2021 o'quv yilidan Surxondaryo viloyati Termiz shahrida “Imom Termiziy” o'rta maxsus islom ta'lim muassasasi tashkil etildi.

Ta'lim muassasasi O'zbekiston Respublikasi Adliya vazirligi tomonidan 2020 yil 8 iyunda 24-sonli guvohnoma bilan davlat ro'yxatidan o'tkazildi. Mazkur O'zbekiston musulmonlari idorasi tasarrufidagi diniy ta'lim maskani o'rta maxsus diniy ma'lumotli islom shariati va hadis ilmlari mutaxassisi, imom-xatiblar tayyorlaydi. Ta'lim muassasada o'qish muddati to'rt yil bo'lib, kunduzgi ta'lim shaklida olib boriladi.

Manzil: Surxondaryo viloyati, Termiziy shahar, Shimoliy Darvoza ko'chasi, 3-uy (55) 451-05-96

https://imomtermiziy.uz

t.me/termiziylar

Lokatsiya

O'zbekiston musulmonlari idorasi

Matbuot xizmati