Surxondaryoda yangi barpo etilgan Imom Termiziy jome masjidiga O‘zbekiston musulmonlari idorasi raisi, muftiy Usmonxon Alimov va boshqa e’tiborli mehmonlar hamda ommaviy axborot vositalari vakillari tashrif buyurdi.

Imom Termiziy majmuasidagi masjidning ochilishini, bu marosimga muftiy hazratlarining tashrif buyurganini eshitgan viloyat ahlining uzoq qishloqlarda yashaydigan namozxonlari ham kela boshladi.

Imonli, e’tiqodli odamlar uylaridan ikkita oliyjanob niyat bilan yo‘lga chiqqan: yangi masjidda kamoli ixlos ila namoz o‘qish; muftiy hazratlarini ziyorat qilib, amri ma’ruflarini tinglash.  Zero, Alloh taolo Qur’oni karimda: “Ular yana tunlarni Parvardigorga sajda qilgan va tik turgan (bedor) holda o‘tkazadigan kishilardir” (Furqon surasi, 64-oyat), deb ta’riflagan mo‘min-musulmonlar aynan shu insonlardir.