2 noyabr kuni Buxoro viloyatidagi Bahouddin Naqshband majmuasida diniy sohada amalga oshirilgan ulkan islohotlarni keng targ‘ib etish borasida “Mustaqillik va diniy qadriyatlar rivoji” mavzuidagi respublika konferensiyasi bo‘lib o‘tdi.

Anjumanda Vazirlar mahkamasi huzuridagi Din ishlari bo‘yicha qo‘mita, O‘zbekiston musulmonlari idorasi, Toshkent islom universiteti, Imom Buxoriy xalqaro markazi xodimlari, O‘zbekiston musulmonlari idorasining Qoraqalpog‘iston Respublikasi, viloyatlar va Toshkent shahridagi vakillari, masjid imom-xatiblari hamda O‘zbekiston musulmonlari idorasi tasarrufidagi bilim yurtlari rahbarlari ishtirok etdilar.

Tadbirda: O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita raisi Ortiqbek Yusupov “Mustaqillik yillarida diniy qadriyatlar tiklanishiga zamin bo‘lgan huquqiy asoslar”; O‘zbekiston musulmonlari idorasi raisi, muftiy Usmonxon Alimov “Mustaqillik ne’matining dinimiz asoslarini tiklashga keng ochib bergan imkoniyatlari”; Toshkent islom universiteti rektori Ravshan Abdullayev “Mamlakatimiz mustaqilligi diniy kadrlar tayyorlashda ochgan imkoniyatlar – ona-Vatanimizdagi ilmiy salohiyatining xalqaro miqyosda tanilishi va e’tirof etilishida asosiy omil”; Imom Buxoriy xalqaro markazi direktori Shovosil Ziyodov “Diniy soha mutaxassislarining kasbiy mahoratini yuksaltirishda Imom Buxoriy xalqaro markazining tutgan o‘rni”  kabi mavzularda ma’ruzalar qildilar. Shuningdek, konferensiya ishtirokchilari O‘zbekiston musulmonlari idorasining “Movarounnahr” nashriyoti va Toshkent islom universitetining “Toshkent islom universiteti nashriyot-matbaa birlashmasi” hamkorligida tashkil etilgan kitoblar ko‘rgazmasida mustaqillik yillarda nashr qilgan diniy-ijtimoiy hamda ma’rifiy mazmundagi adabiyotlar, qo‘llanma va darsliklar bilan tanishdilar.

Anjumanda yurtimizda diniy-ma’naviy sohada amalga oshirilgan ulkan o‘zgarishlar, erishilgan yutuqlarni keng jamoatchilikka targ‘ib etish, yuzasidan diniy soha xodimlari oldida turgan muhim vazifalar belgilab olindi.

O‘MI Axborot xizmati

Suratlar muallifi Shahzod Shomansurov