O‘zbekiston musulmonlari idorasi Oliy Hay’ati yig‘ilishi qarorlari ijrosini ta’minlash hamda tizim xodimlarining huquqiy savodxonligini yanada oshirish maqsadida Toshkent shahridagi tuman masjidlari ish yurituvchilari uchun o‘quv-amaliy mahorat darsi bo‘lib o‘tdi.

Tadbirda Diniy idoraning Huquqshunoslik bo‘limi mutaxassislari ishtirok etib, sohaga oid qonunchilik talablari hamda ijro intizomi yuzasidan quyidagi muhim masalalarga alohida e’tibor qaratdilar: 
 

• Masjidlarning rahbar organlari tarkibida o‘zgarishlar yuz berganda, bu haqda belgilangan tartibda (bir oy muddat ichida) adliya idoralariga rasmiy ma’lumot kiritish;
   

• Masjid ustavi, guvohnomalari va boshqa ta’sis hujjatlarini amaldagi qonunchilik talablari asosida to‘g‘ri yuritish va saqlash;
   

• Imom-xatib va imom noiblarining besh vaqt namozda o‘z xizmat vazifalarida (joyida) bo‘lishini qat’iy ta’minlash;
   

• Masjid binolarida olib boriladigan qurilish va ta’mirlash ishlari loyiha hujjatlarini oldindan vakolatli idoralar bilan kelishish. 
   

Ochiq muloqot va qizg‘in savol-javoblar ruhida o‘tgan mahorat darsida ishtirokchilar kundalik ish faoliyatida duch kelayotgan turli huquqiy masalalar yuzasidan mutaxassislardan atroflicha tushuntirish va amaliy tavsiyalar oldilar. 
 

O‘zbekiston musulmonlari idorasi

Matbuot xizmati