Yosh imomlar ishtirokida o‘quv-seminar tashkil etildi
Farg‘ona viloyati vakilligida 2023-2024 o‘quv yilida diniy ta’lim muassasalarini tamomlab, sohada faoliyat boshlagan yosh xodimlar ishtirokida o‘quv-seminar bo‘lib o‘tdi. Unda viloyat bosh imom-xatibi Ubaydulloh domla Abdullayev, bosh imom-xatib o‘rinbosari Alisher domla Naimov, Buvayda tumani bosh imom-xatibi Ahmadxon domla Nizomov va boshqa mutasaddilar qatnashdi.
Seminarda yosh imomlar bilan samimiy muloqot qilinib, ularning faoliyati, amalga oshirayotgan ishlari o‘rganildi hamda kelgusidagi maqsadlari bilan tanishildi. Ma’ruzachi ustozlar imomlik sharafi va mas’uliyati, diniy-ma’rifiy sohada olib borilayotgan islohotlar mazmun-mohiyati, yoshlarga berilayotgan imkoniyat va imtiyozlar haqida so‘zlash bilan bir qatorda hayotiy tajriba va malakalari bilan ham o‘rtoqlashdilar.
Ajdodlarimiz azaldan Ahli sunna val-jamoa aqidasi, Hanafiy mazhabining fiqhiy ta’limotlariga amal qilib kelganliklari, davrimizda esa millatni ushbu yo‘ldan og‘dirishga bo‘layotgan urinishlarning ortishi va ularning salbiy oqibatlari xususida "Dinimizda mazhablarning o‘rni va ahamiyati" mavzusidagi ma’ruzada to‘xtalindi. Ulamolarning yo‘llari, ilmiy va hayotiy misollar bilan seminar yanada manfaatli o‘tdi.
Seminar davomida Marg‘ilon shahridagi "Burhoniddin Marg‘iloniy" yodgorlik majmuasiga safar tashkillanib, davlat rahbari tashabbuslari bilan mazkur majmua ustida katta islohot boshlangani e’tirof etildi.
Farg‘ona viloyati vakilligi Matbuot xizmati
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
- «
- »