Savol: Guvohlarsiz nikohdan o‘tganmiz. Shu nikohimiz to‘g‘ri bo‘lganmi? Agar noto‘g‘ri bo‘lgan bo‘lsa, nima yo‘l tutishimiz kerak?

Javob: Bismillahir Rohmanir Rohiym. Nikohda guvohlarning bo‘lishi shartdir. Bu haqida Payg‘ambarimiz sollallohu alayhi vasallam bunday deganlar:

لَا نِكَاحَ إلَّا بِشُهُودٍ

“Nikoh faqat guvohlar bilan durust bo‘ladi” (Imom Bayhaqiy rivoyati).
Shunga ko‘ra, agar nikoh guvohlarsiz, ya’ni kamida ikki erkak yoki bir erkak va ikki ayolning guvohligisiz o‘qilgan bo‘lsa, uni guvohlar huzurida qaytadan o‘qish lozim bo‘ladi.

فِي مَآلِ الْفَتَاوَى لَوْ تَزَوَّجَ بِغَيْرِ شُهُودٍ ثُمَّ أَخْبَرَ الشُّهُودَ عَلَى وَجْهِ الْخَبَرِ لَا يَجُوزُ إلَّا أَنْ يُجَدِّدَ عَقْدًا بِحَضْرَتِهِمْ .

“Maolil-Fatovo kitobida yozilishicha, bir kishi guvohlarsiz nikohlansa, so‘ng guvohlarga bu haqida xabar bersa, durust bo‘lmaydi. Faqat nikohni guvohlar huzurida yangidan o‘qitsa, shundagina nikohi durust bo‘ladi” (“Al-Bahr ar-Roiq” kitobi). Vallohu a’lam.

O‘zbekiston musulmonlari idorasi
Fatvo markazi