O‘zbekiston Respublikasi Prezidenti Shavkat Mirziyoyev 19 fevral kuni mamlakatimizda tashrif bilan bo‘lib turgan Saudiya Arabistoni Podshohligi haj va umra ishlari vaziri Tavfiq bin Favzon ar-Rabia boshchiligidagi delegatsiyani qabul qildi.
Uchrashuv avvalida yuqori martabali mehmon davlatimiz rahbariga Saudiya Arabistoni Podshohi Salmon Ol Saud va Valiahd, mamlakat Bosh vaziri Muhammad Ol Saudning salomi va samimiy tilaklarini yetkazdi. Vazir, shuningdek, Podshohning ko‘p millatli O‘zbekiston xalqiga hadyasi – muqaddas Ka’ba yopinchig‘i kisvaning bir parchasini topshirdi.
O‘zbekiston yetakchisi, o‘z navbatida, Saudiya Arabistoni rahbariyatiga bebaho tuhfa hamda ziyoratchilarimizning musulmon dunyosi markazlari - Makka va Madinada bo‘lishi uchun yaratilgan imkoniyatlar va qulay sharoitlar uchun chuqur minnatdorlik bildirdi. Birgina o‘tgan yilning o‘zida 800 mingdan ziyod fuqarolarimiz Umra ziyoratini, 15 ming nafari Haj ibodatini ado etdi.
Suhbat chog‘ida o‘zbekistonlik ziyoratchilarga shart-sharoitlar va ko‘rsatilayotgan xizmatlar sifatini yanada yaxshilash, ularning Saudiya Arabistoniga tashrifi xavfsiz va qulay bo‘lishini ta’minlash masalalariga alohida e’tibor qaratildi.
Muqaddas haj ibodatlarini to‘liq ado etgan hojilarimiz yurtimizga bosqichma-bosqich qaytib kelishmoqda.
Alloh taoloning fazlu marhamati bilan muborak haj safariga musharraf bo‘lgan Samarqand viloyati ziyoratchilarining barchasi vatanimizga sog‘-salomat qaytishdi.
Ziyoratchilarni kutib olish tadbirlari yuqori saviyada tashkil etilib, ular oila a’zolari, yaqinlari va keng jamoatchilik tomonidan katta xursandchilik bilan qarshi olindi.
Safar davomida ziyoratchilarimizga barcha sharoitlar yaratildi. Ularga tajribali ellikboshilar, ishchi guruh va mutaxassislar doimiy xizmatda bo‘lishdi.
Hojilar muqaddas zaminlarda yurtimiz tinchligi, xalqimiz farovonligi va davlatimiz ravnaqi uchun duolar qilishdi.
O‘zbekiston musulmonlari idorasi
Matbuot xizmati