Muhtaram Prezidentimizning «Ramazon – saxovat, birdamlik va bag‘rikenglik oyi» g‘oyasi asosida Toshkent shahrida ham saxovat tadbirlari yuqori saviyada o‘tkazilyapti.
Ramazonning to‘rtinchi kuni (4 mart) Toshkent shahar bosh imom-xatibi Abduqahhor domla Yunusov Bektemir tumaniga tashrif buyurdilar.
Tumandagi 5 ta nogironligi bor, kam ta’minlangan, boquvchisini yo‘qotgan oilalar holidan xabar olinib, ularga oziq-ovqat mahsulotlari tarqatildi.
Muruvvat ko‘rsatilgan oilalardan birida rus millatiga mansub yoshi ulug‘ onaxon yashaydi. Onaxon saxovatdan mamnun bo‘lib, bu xayrli ishlarning boshida turgan aziz insonlarni alqadi.
Islom bag‘rikeng, o‘zga millat va boshqa din vakillariga mehr-saxovat ko‘rsatadigan dindir.
Zotan, qaysi jamiyatda diniy bag‘rikenglik tamoyillariga rioya qilinsa, o‘sha jamiyatda o‘zaro hurmat va samimiyat qaror topib, barcha insonlar tinch va osoyishta hayot kechiradilar. Tinchliksiz taraqqiyot va farovonlik bo‘lmagani kabi diniy bag‘rikengliksiz tinchlik barqaror emas.
Alloh taolo ehsonlarni qabul aylasin!
Bu kabi xayr-saxovat tadbirlari shahrimizning boshqa tumanlarida ham davom etadi.
O‘zbekiston musulmonlari idorasi
Matbuot xizmati
Abu Ayyub Ansoriy roziyallohu anhudan rivoyat qilinadi. Payg‘ambarimiz alayhissalom Isro kechasida Ibrohim alayhissalomning oldilaridan o‘tdilar. Ibrohim alayhissalom: "Ey Jabroil, yoningizdagi bu kim?" deb so‘radilar. Jabroil alayhissalom: "Bu Muhammad sollallohu alayhi vasallamdir", deb javob berdilar. Shunda Ibrohim alayhissalom Muhammad sollallohu alayhi vasallamga: "Ummatingizga buyuring, jannat daraxtlarini ko‘p eksinlar. Zero, jannatning tuprog‘i unumdor va yeri juda keng", dedilar. Payg‘ambarimiz alayhissalom: "Jannatning daraxtlari qaysi?" deb so‘radilar. Ibrohim alayhissalom: "Laa havla va laa quvvata illa billah" kalimasi, deb javob berdilar.