Toshkent islom institutining 3-kurs qoriyasi Robiyaxon Muzaffarxonova 30 pora Qur’oni karimni bir kunda, 12 soat davomida yoddan o‘qib berdi.

Qur’oni karimni o‘qish jarayonini “Qur’on ilmlari” kafedrasi o‘qituvchilari Jahongir qori Ne’matov, Ahmadxon qori Rashidov, Valixon qori Azimboyev, Abdulbosit qori Qobilov, Robiya Najmiddinova va boshqa ustoz hamda talabalar kuzatib borishdi.

Toshkent islom instituti rektori, tarix fanlari nomzodi Uyg‘un domla G‘ofurov mazkur natijani e’tirof etib, ustozlarga g‘ayrat va shijoat tiladi. Qur’oni karimni 12 soatda yoddan o‘qib xatm qilgan Robiyaxon Muzaffarxonova noutbuk va esdalik sovg‘alari bilan taqdirlandi.

Ta’kidlash joizki, “Qur’on ilmlari” kafedrasi ustozlarining mehnati natijasida Toshkent Islom institutida Qur’oni karimni bir kunda to‘liq yoddan o‘qib berish an’anaga aylandi. Bugunga qadar bunday yutuqqa erishgan qoriya talabalar soni 12 nafarga yetdi. 

O‘zbekiston musulmonlari idorasi 
Matbuot xizmati