Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Ibrohim alayhissalom Allohning buyrug‘i bilan zavjasi Hojar va go‘dagi Ismoilni hech narsa o‘smaydigan va kimsasiz Makkaga tashlab ketdi. So‘ngra o‘sha mashhur «Zamzam» hodisasi bo‘lib o‘tdi. Alloh taolo ona-bola zerikmasligi uchun ular tomon Jurhum qabilasini jo‘natdi. Ismoil alayhissalom ular orasida unib o‘sdi. Ulardan arab tilini o‘rgandi. So‘ngra ularning qiziga uylandi. Vaqt o‘tgach Hojar onamiz vafot qildi. Bir qancha vaqt o‘tib Ibrohim alayhissalom ularning holidan xabar olish uchun keldi. U kishi kelganida Ismoil alayhissalom uyda yo‘q edi. Ibrohim alayhissalom kelinidan Ismoil alayhissalomning qayerdaligini so‘radi. Kelini eri tirikchilik uchun ketganini aytdi. Ibrohim alayhissalom ularning ahvoli, tirikchiligi haqida so‘radi. Ayol shikoyat qildi: «Nihoyatda ahvolimiz yomon. Doimo qiyinchilik va tanglikdamiz!».

Ayol Ibrohim alayhissalomni tanimasdan, u kishiga turmushdan nolib ancha shikoyat qildi. Shunda Ibrohim alayhissalom: «Ering kelsa mendan unga salom ayt. Unga ayt, uyining ostonasini almashtirsin!», dedi.

Ismoil alayhissalom kelib nimadir sodir bo‘lganini bildi. Xotinidan so‘radi:

- Biror kishi keldimi?

- Ha! Bir chol keldi. Sizni so‘radi. Men xabar berdim. Turmushimiz haqida so‘radi. Men unga faqirligimiz va qiynalayotganimiz haqida gapirdim!

- U senga biror narsa dedimi?

- Ha! Sizga salom aytdi. Uyingiz ostonasini almashtirar ekansiz!

- Ismoil alayhissalom dedi:

- U kishi otam edi. Menga seni taloq qilishimni amr qilibdi. Uyingga boraver!

Ibrohim alayhissalom kelinining obro‘sini to‘kmadi, Alloh saqlasin! To‘g‘ri, payg‘ambarlar xonadonida kufr bo‘lgan, lekin xiyonat bo‘lmagan. Qur’oni Karimda xabari kelgan Nuh va Lut alayhissalomlarning xotinlari aqidada xiyonat qilishgan, to‘shakda emas!

Ibrohim alayhissalom kelinining nolishini, shikoyatini, noroziligini ayb sanadi. Doimo shikoyat qiladigan, rizq masalasida noliydigan xotin baloyi azimdir! Erkaklar ham!

Ismoil alayhissalom xotinining «tirikchilik uchun ketgan» degan gapiga qaraganda ro‘zg‘orni tashlab qo‘ymagan. Ammo xotinining boshqalar qo‘lidagi narsalarga boqishi o‘zlaridagi narsalarni ko‘ra olmasligiga sabab bo‘lgan. Bu narsa noshukrlikka olib borgan. Shuning uchun Ibrohim alayhissalom o‘g‘liga xotinini taloq qilishini buyurdi!

Xuddi shuningdek, Umar roziyallohu anhu ham o‘g‘liga xotinini taloq qilishni aytgan edi. O‘g‘li ham bo‘ysungan.

Bir kishi imom Ahmad rohimahullohning huzuriga kelib, otasi undan xotinini taloq qilishini talab etayotganini aytdi. Imom Ahmad undan so‘radi:

- Unda diniga tegishli ayb ko‘rasanmi?

- Yo‘q!

- Unda taloq qilma!

- Ibrohim alayhissalom va Umar roziyallohu anhu o‘g‘illariga xotinini taloq qilishini aytganda ular bajarishgan ekan-ku!

- Agar sening otang ham Ibrohim alayhissalom yoki Umar roziyallohu anhudek bo‘lsa, undan keyin taloq qilasan!

Gapning xulosasi shuki, agar xotin soliha bo‘lsa, diyonatli bo‘lsa, o‘g‘il uni taloq qilishga majbur emas. Uylarni xarob qiladigan itoat va soliha xotindan judo bo‘lish ota-onaga yaxshilik qilishga kirmaydi. Ammo ota-onangiz xotiningizni yoqtirishmasa-da, ularga yaxshilik qilishda davom etasiz!

Bu dunyo sinov dunyosidir. Rizq ham dunyodagi Allohning sinovlaridan biridir. Biz erkagu ayollar Allohga nisbatan odob chegarasini saqlashimiz lozim. Rizqning sabablarini, mehnat qilishni tark etmaganimiz holda qadarga rozi bo‘lishimiz kerak. Allohning qismatiga rozi bo‘lish boylikdir. Norozilik esa faqirlikdir. Ota-onalar ham Allohdan qo‘rqib, farzandlarining oilasini barbod qilmasliklari kerak!

«Nabaviy tarbiya» kitobi asosida tayyorlandi