Saraton kasalligiga shifo bo‘lgan duo
Bismillahir Rohmanir Rohiym
Usmon ibn Hunayf roziyallohu anhudan rivoyat qilinadi: Bir ko‘zi ojiz (ko‘r) kishi Nabiy sollallohu alayhi vasallamning oldilariga kelib, “Menga shifo berishini so‘rab, Allohga duo qiling” dedi. Shunda Rosululloh sollallohu alayhi vasallam: “Agar xohlasang duo qilaman va agar xohlasang sabr qilgin va mana shu sen uchun yaxshisidir”, dedilar. Ko‘zi ojiz kishi esa “Duo qila qoling” dedi. Shunda Rosululloh sollallohu alayhi vasallam unga tahorat olishlikni va tahoratini go‘zal qilishligini so‘ngra ushbu duo bilan duo qilishlikni buyurdilar:
اللَّهُمَّ إِنِّي أَسْأَلُكَ، وَأَتَوَجَّهُ إِلَيْكَ بِنَبِيِّكَ مُحَمَّدٍ نَبِيِّ الرَّحْمَةِ، إِنِّي تَوَجَّهْتُ بِكَ إِلَى رَبِّي فِي حَاجَتِي هَذِهِ لِتُقْضَى لِيَ اللَّهُمَّ فَشَفِّعْهُ فِيَّ
O‘qilishi: Allohumma inniy asaluka va atavajjahu ilayka binabiyyik Muhammad Nabiyyir-Rohmah, inniy tavajjahtu bika ilaa Robbiy fiy haajatiy haazihi lituqzoo liya, Allohumma fashaffi’hu fiyya.
Ma’nosi: Allohim Sendan so‘rayman va Payg‘ambaring, olamlarga rahmat Payg‘ambar bo‘lmish Muhammad sollallohu alayhi vasallam bilan Senga yuzlanaman. Yo Muhammad sollallohu alayhi vasallam Alloh meni bu hojatimni bajo keltirishi uchun men Siz bilan ushbu hojatim borasida Robbimga yuzlandim. Allohim U (Muhammad sollallohu alayhi vasallam)ning men boramdagi shafoatlarini qabul etgin (Imom Termiziy rivoyati 3578-hadis).
Ushbu hadis boshqa muhaddislar tomonidan ham rivoyat qilingan bo‘Iib, uni sahih deyishgan. Xususan Imom Ahmad rohimahulloh musnadida ushbu hadisni keltirib, unda Rasululloh sollallohu alayhi vasallam tahoratdan so‘ng ikki rakat namoz o‘qishga ham buyurganlarini rivoyat qilgan.
Imom Nasoiy rohimahulloh esa bu hadisning oxirida “Bu duodan so‘ng Alloh taolo uning ko‘zini ochdi” deb aytgan va Imom Ibn Moja va ibn Xuzayma rahimahumalloh ham “U ko‘rishni boshladi” deb ziyoda qilishgan.
Bu dunyoda biror-bir kasallik yo‘q-ki, uni davosi bo‘lmasa, dardni yaratgan Zot shifosini ham O‘zi xohlagan kishisiga ato etadi. Ammo Alloh taolo xohlamasa na tibbiyot va na davo dardga yordam bera olmaydi.
Mirabbos YOROV,
Toshkent Islom instituti bitiruvchisi.
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »