#xabar #hamkorlik
O‘zbekiston Respublikasi Prezidenti Administratsiyasi Diniy-ma’rifiy masalalar bo‘yicha departamentining boshlig‘i, O‘zbekiston xalqaro islomshunoslik akademiyasi rektori Muzaffar Kamilov, Din ishlari bo‘yicha qo‘mita raisining birinchi o‘rinbosari, professor Davron Maxsudov, O‘zbekiston musulmonlari idorasi raisining birinchi o‘rinbosari Homidjon domla Ishmatbekov, shuningdek, Imom Moturidiy xalqaro ilmiy-tadqiqot markazi va O‘zbekiston xalqaro islomshunoslik akademiyasi mas’ul xodimlaridan iborat O‘zbekiston delegatsiyasi Misr Arab Respublikasida xizmat safarida bo‘lib turibdi.
Dastlab Muzaffar Kamilov boshchiligidagi O‘zbekiston delegatsiyasi “Al-Azhar” majmuasi rahbari o‘rinbosari, bosh imom o‘rinbosari va Islom tadqiqotlari akademiyasi bosh kotibi Doktor Muhammad Abdurrahmon ad-Duvayniy bilan uchrashuv o‘tkazdi. Unda “Al-Azhar” majmuasi raisi va “Al-Azhar” bitiruvchilari butunjahon tashkiloti kengashi raisi o‘rinbosari doktor Salama Dovud, Islom tadqiqotlari akademiyasi bosh kotibi Doktor Muhammad al-Jundiy va bir qator davlat arboblari hamda O‘zbekistonning Misrdagi elchixonasi vakillari ishtirok etdi.
Uchrashuvda ikki davlat o‘rtasidagi ilmiy tadqiqot sohasidagi hamkorlikni kuchaytirish masalalari muhokama qilindi.
Muzaffar Kamilov ad-Duvayniy bilan o‘zbekistonlik talabalarni Al-Azharga qabul qilishni osonlashtirish maqsadida ta’lim, targ‘ibot va o‘qitish, talabalar va professor-o‘qituvchilar almashinuvi, qo‘shma ilmiy dasturlarni tashkil etish va O‘zbekistondagi ta’lim sertifikatiga tenglashtirilishi sohalarida hamkorlikni kuchaytirish yo‘llarini muhokama qildi.
Shuningdek, Imom Moturidiy ilmiy merosini birgalikda tadqiq etish, ekstremizmga qarshi kurashda o‘zaro tajriba almashish va birgalikda ilmiy anjumanlar tashkil etish masalalari ko‘rib chiqildi.
Muzokaralar yakunida belgilangan vazifalarni amalga oshirish bo‘yicha maxsus ishchi guruhning xulosalari soha mutasaddilariga taqdim etishi belgilandi.
O‘zbekiston musulmonlari idorasi
Matbuot xizmati
Bir guruh namanganlik faol nuroniylar qo‘shni Qozog‘iston Respublikasining Turkiston shahriga ziyorat va sayohat safarini uyushtirdi. Ezgu maqsadda yo‘lga chiqqan otaxonlar safar davomida hududdagi tarixiy obidalar, muqaddas qadamjolar va zamonaviy bunyodkorlik namunalari bilan yaqindan tanishdi.
Ziyorat dasturi Turkiston shahrida O‘zbekiston Respublikasi Prezidenti Shavkat Mirziyoyev tashabbusi bilan barpo etilgan muhtasham masjid majmuasidan boshlandi. O‘zining betakror me’moriy yechimi, nafis bezaklari hamda milliy va islomiy qadriyatlarni o‘zida mujassam etgan ko‘rinishi bilan ajralib turuvchi ushbu ziyoratgoh nuroniylarda katta taassurot qoldirdi. Ziyoratchilar majmuada yaratilgan sharoitlarni alohida e’tirof etib, qardosh xalqlar o‘rtasidagi do‘stlik rishtalari yanada mustahkamlanib borayotganini mamnuniyat bilan qayd etdi.
Safarning keyingi manzili butun islom olamida yuksak ehtiromga sazovor bo‘lgan buyuk mutafakkir Xo‘ja Ahmad Yassaviy maqbarasi bo‘ldi. Nuroniylar ushbu tabarruk qadamjoda Qur’on tilovat qilib, yurtimiz tinchligi, xalqimiz farovonligi va yurt osoyishtaligini so‘rab xayrli duolar qildilar. Ziyorat doirasida nuroniylar tomonidan jonliq so‘yilib, ehson dasturxoni ham yozildi.
Qardosh o‘lkaga uyushtirilgan ushbu ma’naviy safar tarix, madaniyat va diniy qadriyatlar mushtarakligini yana bir bor his ettirgan holda, ziyoratchilarda unutilmas xotiralar qoldirdi.
O‘zbekiston musulmonlari idorasi
Matbuot xizmati