Shu yilning 16–18 aprel kunlari O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi delegatsiya ikki tomonlama aloqalarni rivojlantirish va vatandoshlar bilan uchrashuvlar o‘tkazish maqsadida Rossiya Federatsiyasida xizmat safarida bo‘ladi.
Safar doirasida:
diniy idoralar o‘rtasida hamkorlikni mustahkamlash;
imzolangan kelishuvlarni amalga oshirish;
o‘zaro tajriba almashish;
ta’lim dargohlarida bo‘lish;
jome masjidlar faoliyati bilan yaqindan tanishish kabilar reja qilingan.
Shuningdek, Moskva shahrida o‘qish yoki ish bilan yurgan hamyurtlarimiz bilan muloqotlar qilish, ularning fikr-mulohazalarini tinglash va e’tiqod sog‘lomligiga qaratilgan suhbatlar o‘tkazish ko‘zda tutilgan.
O‘zbekiston musulmonlari idorasi
Matbuot xizmati
Shu kunlarda Samarqand viloyati Urgut tumanidagi "Qozi Oblayorbek" jome masjidini yangi qurilgan tahoratxonasi foydalanishga topshirildi.
Ochilish marosimida O‘zbekiston musulmonlari idorasi raisi o‘rinbosari Zayniddin domla Eshonqulov, masjid imom-xatibi Dilmurod domla Qo‘shaqov boshchiligidagi xodimlar va jamoat ahli hamda mahalla faollari ishtirok etdi.
Tadbirda Zayniddin domla masjid ahlini zamonaviy tahoratxona bilan tabriklab, Haq taoloning bayti obodligiga hissa qo‘shishning ajru mukofoti haqida so‘zlash barobarida saxovatpesha insonlar, ustalar va hasharlarda faol qatnashgan kishilar haqqiga xayrli duolar qildi.
O‘zbekiston musulmonlari idorasi
Matbuot xizmati