Joriy yilning 6 may kuni Toshkent viloyatida xotin-qizlar ma’naviyatini yuksaltirish va oilalar mustahkamligini ta’minlashda faollik ko‘rsatayotgan otinoyilar o‘rtasida «Eng namunali otinoyi» ko‘rik-tanlovi bo‘lib o‘tdi. Tadbirda viloyat hokimligi va O‘zbekiston musulmonlari idorasi vakillari ishtirok etib, otinoyilarning jamiyat barqarorligidagi o‘rnini alohida e’tirof etdilar.

Hakamlar hay’ati ishtirokchilarning faoliyati, bilim darajasi va mahallalardagi ijtimoiy-ma’naviy muhitni sog‘lomlashtirishga qo‘shgan hissasini baholab bordi. 

Yakuniy natijalarga ko‘ra, ko‘rik-tanlovning 1-o‘riniga Yangiyo‘l tumani otinoyisi Hanifaxon Nishonova, 2-o‘riniga Parkent tumani otinoyisi Maxsuma G‘anixonova hamda 3-o‘riniga Zangiota tumani vakilasi Dilbar Hamdamova munosib deb topildi.

G‘oliblarga tashakkurnoma va qimmatbaho esdalik sovg‘alari topshirildi.

Ma’rifat yo‘lida xizmat qilayotgan barcha otinoyilarimizga kelgusi faoliyatlarida zafarlar tilaymiz.

O‘zbekiston musulmonlari idorasi

Toshkent viloyati vakilligi

Matbuot xizmati