2023 yil 25-26 noyabr' kunlari Toshkent va Buxoro shaharlarida bo'lib o'tgan nufuzli tadbirlar hamda xalqaro konferentsiyalarda ishtirok etgan muftiylar va ulamolar nomidan O'zbekiston musulmonlari idorasi raisi, muftiy Shayx Nuriddin Holiqnazar hazratlariga minnatdorlik maktublari kelmoqda.

Ana shunday maktublardan biri Tojikiston Islom markazi raisi, Tojikiston muftiysi Saidmukarram Abduqodirzoda janoblaridan kelgan. Jumladan:
– Mashhur Mir Arab madrasasining 500 yilligiga bag'ishlangan xalqaro konferentsiyani a'lo darajada o'tkazilgani, O'zbekiston Respublikasida samimiy qabul va mehmondo'stlik ko'rsatilgani uchun chuqur ehtiromimiz va chin dildan minnatdorligimizni qabul qilgaysiz. Shuningdek, ushbu safarda munosib xizmat ko'rsatgan va doimiy hamrohliq qilgan Toshkent shahridagi “Ko'kaldosh” o'rta maxsus islom bilim yurti mudiri Abduhakim qori Matqulovni biriktirilgani uchun alohida tashakkur izhor etamiz.

Umid qilamizki, bunday muhim va dolzarb tadbirlar diniy idoralar rahbarlarining o'zaro tushunishi va hamkorligiga katta hissa qo'shadi, global tinchlik va ikki tomonlama muloqotni rivojlantirishga muhim omil bo'lib xizmat qiladi. Kelajakda aloqalarimiz va do'stligimiz yanada mustahkamlanadi, deyiladi minnatdorlik maktubida.

Mana shunday minnatdorlik maktublarida yuksak e'tibor va yuqori darajadagi tashkilotchilik uchun tashakkur bildirish barobarida Islom dini rivoji yo'lidagi hamkorlikni mustahkamlash va musulmon ummati uchun dolzarb masalalarga echim topish borasidagi uchrashuvlar yuqori baholangan.

O'zbekiston musulmonlari idorasi Matbuot xizmati