#xabar #haj2026

Жорий йилги Ҳаж мавсумига тайёргарлик ишлари мамлакатимиз бўйлаб қизғин давом этмоқда. Хусусан, Ўзбекистон мусулмонлари идорасида Қорақалпоғистон Республикаси, Тошкент, Сирдарё, Хоразм ва Сурхондарё вилоятлари ҳамда Тошкент шаҳридан Ҳаж мавсуми учун бириктирилган гуруҳ раҳбарлари иштирокида видеоселектор йиғилиши бўлиб ўтди. 

Машғулотларда Тошкент шаҳар бош имом-хатиби Абдуқаҳҳор домла Юнусов, Дин ишлари бўйича қўмита бўлим бошлиғи Бобомурод Рустамов, Ўзбекистон мусулмонлари идораси Ҳаж ва умра тадбирларини ташкил этиш маркази директори Мақсуд Каримов ҳамда соҳа мутахассислари қатнашдилар. 

Йиғилишда гуруҳ раҳбарларига Ҳаж мавсумидаги муҳим вазифалар эслатиб ўтилди. Элликбошиларга зиёратчиларга Исломнинг бешинчи рукни бўлган Ҳаж ибодати мазмун-моҳияти ҳақида тушунтириш зарурлиги таъкидланди. 

Шунингдек, ҳаж сафарига доир қонунчилик ва меъёрий ҳужжатларни пухта билиш, муборак сафар давомида зиёратчилар билан доимо хушмуомалада бўлиш, ўзаро ёрдам муҳитини шакллантириш, зикру ибодатларни кўпайтириб, беҳуда ишлардан тийилиш бўйича зарур кўрсатмалар берилди. 

Тадбир якунида иштирокчилар ўзларини қизиқтирган барча саволларга батафсил жавоб олдилар. 

Ўзбекистон мусулмонлари идораси
Матбуот хизмати