Ўзбекистон “Адолат” социал-демократик партияси ташаббуси ҳамда Республика қон қуйиш маркази ҳамкорлигида Ўзбекистон мусулмонлари идорасида кўчма қон йиғиш хайрия тадбири ташкил этилди.

“Бор меҳримиз сенга, болажон!” шиори остида ўтказилаётган беғараз донорлик акциясида Диний идора ходимлари фаол иштирок этиб, қонга муҳтож ва бемор болажонлар саломатлиги йўлида ўзларининг муносиб ҳиссаларини қўшди. Халқимизга хос меҳр-мурувват ва саховат рамзи бўлган ушбу тадбир жамиятда инсонпарварлик ғояларини кенг тарғиб этишга хизмат қилади.

Тадбир доирасида Ўзбекистон “Адолат” СДП Сиёсий Кенгаши раиси Робахон Махмудова бошчилигидаги партия фаоллари Ўзбекистон мусулмонлари идораси фаолияти билан яқиндан танишди. Меҳмонларга Идора ходимлари учун яратилган шароитлар, бой китоб фондига эга кутубхона ҳамда маънавий-маърифий кўрсатувлар тайёрланадиган замонавий медиа студия фаолияти ҳақида маълумот берилди.

Учрашувда маънавият, маърифат, ижтимоий ҳамжиҳатликни мустаҳкамлаш ва аҳоли орасида беғараз донорлик маданиятини ривожлантириш йўлида ҳамкорликни янада кенгайтириш муҳимлиги таъкидланди.

Партия раҳбарияти инсонпарварлик акциясини юқори савияда ташкил этишда яқиндан кўмаклашган ва унда фаол иштирок этган Ўзбекистон мусулмонлари идораси раҳбарияти ҳамда жамоасига самимий миннатдорлик билдирди. 

Ўзбекистон мусулмонлари идораси
Матбуот хизмати