Бугун, 20 июль куни соат 18:00 да Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2026-2027 ўқув йили учун ҳужжат топшириш жараёнлари якунланади.  

Маълумот ўрнида, 30 июндан эътиборан республикамиздаги қуйидаги олий ва ўрта махсус диний таълим муассасаларига абитуриентлардан ҳужжатлар қабул қилинмоқда:

• Имом Бухорий номидаги Тошкент ислом институти (Бакалавриат, Магистратура ва Модуль таълим тизими);

• Мир Араб олий мадрасаси;

• Ҳадис илми мактаби;

• Имом Термизий номидаги ислом институти;

• Барча ўрта махсус ислом таълим муассасалари.

Эслатма: Ҳужжат қабули бугун соат 18:00 гача давом этади. Муҳлат тугашига оз вақт қолганини инобатга олиб, абитуриентлардан ҳужжат топшириш жараёнини кечиктирмасликларини сўраб қоламиз!

Абитуриентлар учун қулайлик

Абитуриентлар ўзларига энг яқин жойлашган диний таълим муассасасининг Қабул ҳайъати орқали республикадаги исталган диний таълим муассасасига ҳужжат топширишлари мумкин.

Талаб қилинадиган асосий ҳужжатлар рўйхати:

1. Бакалавриат босқичи учун:

• Муассаса ректори номига ариза;

• Паспорт ёки ID карта нусхаси (асли кўрсатилади);

• Ўрта махсус ислом таълим муассасасини тамомлаганлиги ҳақида диплом ва иловаси нусхаси (асли кўрсатилади);

• 3,5 х 4,5 ҳажмдаги 6 дона рангли фотосурат (оқ фонда, охирги 3 ойда олинган). (Хорижий диний таълим муассасасини тугатган ва нострификациядан ўтган дипломга эга ЎзР фуқаролари ҳам топширишлари мумкин).

2. Ўрта махсус ислом таълим муассасалари учун:

• Муассаса раҳбари номига ариза;

• Паспорт ёки ID карта нусхаси (асли кўрсатилади);

• Аттестат ёки диплом нусхаси (асли кўрсатилади);

• 3,5 х 4,5 ҳажмдаги 6 дона фотосурат;

• Чет тили бўйича камида B2 даражасидаги сертификат нусхаси (мавжуд бўлса — имтиҳонсиз максимал балл берилади).

3. Магистратура босқичи учун:

• Ректор номига ариза, паспорт/ID нусхаси ва 6 дона фотосурат;

• Олий диний таълим муассасаси дипломи ва иловаси нусхаси (асли кўрсатилади);

• Араб тили бўйича камида C1 даражасидаги миллий ёки халқаро сертификат (максимал балл берилади).

4. Модуль таълим тизими учун:

• Ариза, паспорт/ID нусхаси, 6 дона фотосурат;

• Ўрта махсус ислом таълим муассасаси дипломи ва иловаси асл нусхаси;

• Ўзбекистон мусулмонлари идорасининг ҳудудий вакилидан (қозиёт/вакиллик) тавсиянома;

• Тасдиқланган меҳнат дафтарчаси нусхаси.

Тўлов ҳақида: Тест синовларида иштирок этиш учун БҲМнинг ярим баравари (1/2) миқдорида тўлов ундирилади.

Жорий йилда мактаб, лицей ёки коллежни тамомлаганлар, ногиронлиги бўлган шахслар ва тўлиқ давлат таъминотидаги абитуриентлардан тўлов ундирилмайди.

Фурсатни бой берманг, ҳужжатларингизни топширишга шошилинг! 

Ўзбекистон мусулмонлари идораси

Матбуот хизмати