Zikr nima? Zikr – savobli, oson ibodatdir. Aqli bo'lgan har bir yoshu qari ham, sog'u kasal ham zikr ayta olishi mumkin... Zikr oson dedik. Ammo oson bo'lsa-da, savobi ham oz emas, ko'pdir. Bilasizki:

Bir marta ishq ila Alloh desa lison,

To'kilar barcha gunoh misli xazon!

Bir marta «Alloh» deyishning, «Laa ilaha illalloh» deyishning, «Astag'firulloh» deyishning savobi ko'p. «Allohumma salli ala sayyidina Muhammad» deyishning savobi ko'p. Ko'pligi aniq. Chunki, bular haqida yuzlarcha hadisi shariflar bor. Siz ham biror Hadis kitobini, masalan, «Riyozus Solihin»ni o'qisangiz, bilasiz. «Riyozus Solihin»ning inglizchasi ham, turkchasi ham bor, arabchasining ham sharhi bor.

Kitobni o'qib, zikr haqidagi  haqiqatlarni, payg'ambarimiz sollallohu alayhi vasallamning zikrga naqadar bog'liq, berilganliklarini o'rganasiz.

Dastlabki zikr aytishga  dalil sifatida ko'rsatilgan oyati  karima – Bismillahir rohmanir rohiym:

Yo ayyuhallazina omanuz kurulloha zikran kasiro. Va sabbihuhu bukratan va asilo – Ey imon keltirganlar, Allohni ko'p zikr qilinglar! Va ertayu kech u zotni poklab, tasbeh aytinglar!

Tasbeh ham zikrning bir turi, «Subhonalloh» demakdir. Oyatda Allohni ko'p zikr eting, tasbeh ayting deb buyurilganining hikmati ko'p... So'ng sevgan, ko'p ajru mukofotlar va'da qilgan bandalari  haqida ham bir oyati karima bor:

Oyat «Albatta musulmon erkaklar va musulmon ayollar»... deb boshlanadi. Oyatning oxirida esa – Allohni ko'p zikr qilgan erkak va ayollar ham qayd etilib, ularga Alloh ulug' ajru savoblar tayyorlab qo'ygani, mag'firatiga mazhar qilganini ta'kidlaydi. Demak, Allohni ko'p zikr qiluvchilarga ham ulug' va'dalar bor...

Zikr Qur'oni Karimning saksondan ortiq erida buyurilgan ibodatdir. Qadru darajasi juda yuksak ibodatdir. Oson va savobi ko'p ibodatdir... Chunki sen Allohni zikr etsang, eslasang, Alloh ham seni zikr etadi, eslaydi. O'ylab ko'r, koinotni yaratgan, olamlarning Rabbi seni zikr etsa! Bandasi uchun Allohning zikr etishi buyuk sharaf! Kim biladi, bu zikrdan u bandasi nimalarga erishadi? Ta'riflab bo'lmas darajayu martabalarni qo'lga kiritishi mumkin!.. Shuning uchun zikr bir vazifangiz bo'ladi. Zikr vazifalarini bajarasiz.

Zikr vazifalarini butun musulmonlar ado etishlari kerak lekin har bir kishi ham muhim masalalarda harakatchan, faol, jiddiy bo'lmaydi. Hatto oddiy ibodatlarini ham qilmaydilar. Shuning uchun insonlarda kamchiliklar bo'lishi mumkin.

Biz musulmonchilikka to'liq amal qilmoqchi bo'lgan insonlar bo'lganimiz uchun zikr vazifalarini kanda qilmaymiz. Bundan tashqari, zikrning savobi, xosiyati ko'p bo'lganligi bois zikr qiluvchilar tezda katta muvaffaqiyatlarga erishadilar. Tezda Allohning sevgan quli bo'lishi mumkin...

"Islom va axloq" kitobidan olindi