Yoshlar – BMT va O'zbekiston nigohida...
Birlashgan Millatlar Tashkiloti (BMT)ning joriy yilning 31 mart kunida bergan rasmiy ma'lumot va xabarlarida qayd etilganiday, O'zbekiston tashabbusi bilan «Yoshlarning huquqlari bo'yicha do'stlar guruhi» tashkil etildi.
BMT Bosh kotibining yoshlar bilan ishlash bo'yicha vakili Djayatma Vikramanayake O'zbekiston tashabbusi bilan tashkil etilgan «Yoshlar huquqlari bo'yicha do'stlar guruhi»ning taqdimotida ishtirok etdi. Ushbu xalqaro loyiha doirasida sayyoramizdagi yoshlarning huquqlarini ilgari surish va ularning imkoniyatlarini kengaytirish rejalashtirilgan.
Bugungi kunda dunyoda deyarli 2 milliard yoshlar yashamoqda – bu insoniyat tarixidagi eng katta avlod. Dunyoning ayrim mamlakatlarida yoshlar aholining 70 foizini tashkil qiladi.
Shu bilan birga hozirgi inqirozdan oldin nashr etilgan BMT ma'lumotlariga ko'ra, dunyodagi har beshta yoshlardan biri o'qimaydi, kasbiy tayyorgarlikdan o'tmaydi va ishsiz. To'rt kishidan biri to'qnashuvda yashaydi.
Pandemiya vaziyatni yanada og'irlashtirdi: maktab o'quvchilarining kamida uchdan bir qismi ta'lim olish imkoniyatidan mahrum qilindi, yarim milliardga yaqin o'quvchi maktabga bormadi. “Bir qatlam avlod ofatga duch kelmoqda”, – deya ogohlantirdi BMT Bosh kotibi Antoniu Guterrish yaqinda qilgan chiqishida. Shu bilan birga ekstremistik guruhlar ijtimoiy tarmoqlarda faollashib, nafratni yoyib, yoshlarni o'z saflariga qo'shilishga undashmoqda.
«Yoshlar huquqlari bo'yicha do'stlar guruhi»ning asosiy maqsadi – yoshlar siyosati tashabbuslarini qo'llab-quvvatlash va yoshlar huquqlari bo'yicha xalqaro huquqiy hujjatni ishlab chiqish bo'yicha sa'y-harakatlarni rag'batlantirishdir.
Habarimiz bor, BMT Bosh assambleyasining 72-sessiyasida O'zbekiston Respublikasi Prezidenti Shavkat Mirziyoev «Yoshlar huquqlari to'g'risida»gi Konventsiyani qabul qilishni taklif qildi. Ushbu tashabbus xalqaro hamjamiyat tomonidan qo'llab-quvvatlandi. Bugungi kunga qadar o'nlab mamlakatlar guruhga qo'shilishdi, jumladan Ozarbayjon, Qozog'iston, Qirg'iziston Respublikasi, Tojikiston, Turkmaniston va Turkiya davlatlari.
«Yosh avlodning jamoat hayotidagi roli o'sib borayotganiga qaramay, ularning ishtiroki ko'pincha o'zlarining kelajagi uchun muhim bo'lgan qarorlar va jarayonlarga bevosita ta'sir o'tkazish bilan emas, balki faqat maslahatlashuvlar bilan cheklanadi», – deya ta'kidladi O'zbekistonning BMTdagi doimiy vakili Baxtiyor Ibragimov.
Elchi janoblari «Do'stlar guruhi» yoshlar o'rtasidagi muloqotni kuchaytirishda, yoshlar huquqlari bo'yicha xalqaro huquqiy hujjatning ahamiyati to'g'risida munozaralarni targ'ib qilishda muhim rol' o'ynashligini ta'kidlab, boshqa mamlakatlarni ham guruhga qo'shilishga da'vat etdi.
Ibrohimjon INOMOV,
O'zbekiston musulmonlari idorasi raisi o'rinbosari
Agar qadringni bilmoqchi bo‘lsang...
Bismillahir Rohmanir Rohiym
إِذَا أَرَدْتَ أَنْ تَعْرِفَ قَدْرَكَ عِنْدَهُ فَانْظُرْ فِي مَاذَا يُقِيمُكَ
Ibn Atoulloh Sakandariy rahimahulloh aytadilar: “Agar Alloh huzuridagi qadringni bilmoqchi bo‘lsang, U seni nimada mashg‘ul qilib qo‘yganiga nazar sol”.
Sharh: Insonlar odatda o‘z qadrini molu dunyosi, lavozimi, ilm darajasi yoki xalq orasidagi obro‘si bilan o‘lchaydilar. Ammo Alloh nazdidagi haqiqiy qadr dunyo matohlari, obro‘-e’tibor bilan emas, balki insonning nimaga muvaffaq qilingani bilan bilinadi.
Agar Alloh taolo bandasini:
namozga,
Qur’on tilovatiga,
ilm o‘rganish va o‘rgatishga,
ota-ona xizmatiga,
odamlarga manfaat yetkazishga,
yaxshi axloq va solih amallarga muvaffaq qilgan bo‘lsa, bu Allohning unga bo‘lgan lutfi va ehsonidan dalolat.
Allohning nazdidagi qadringni bilishni istasangiz, tilingizni nima bilan, qalbing nima bilan va umringizni nima bilan o‘tayotganiga qarang. Chunki Alloh bandasini O‘zi yaxshi ko‘rgan ishlarda ishlatadi.
Aksincha, inson vaqtini behuda ishlarga, gunohlarga, g‘iybatga, dunyoparastlikka sarflayotgan bo‘lsa, bu uning ziyonda ekani, o‘zini jiddiy hisob-kitob qilib, tavba qilmasa U Zotning azobiga qolishiga sabab bo‘ladi.
Bu hikmat “Alloh menga nima berdi?” degan savoldan ko‘ra, “Alloh meni nimaga muvaffaq qildi?” degan savol muhimroq ekanini o‘rgatadi. Chunki ne’matning eng buyugi – Allohga yaqinlashtiruvchi amallarga muvaffaq bo‘lishdir.
Demak, har bir inson vaqti-vaqti bilan o‘ziga shunday savol berib turishi lozim: “Kunlarim nimalar bilan o‘tmoqda? Qalbim nimaga bog‘langan? Ko‘proq qaysi ishlar bilan mashg‘ulman?”.
Chunki bandaning Alloh nazdidagi maqomiga ishora qiluvchi muhim belgilardan biri – uning qaysi ishlarga muvaffaq qilib qo‘yilganidir.
Muhammad Zarif Muhammad Olim o‘g‘li
