Habaringiz bor, ayni paytda Diniy soha rahbarlari xizmat safari bilan Samarqand viloyatida bo'lib turibdi.

Tashrif davomida O'zbekiston musulmonlari idorasi raisi, muftiy Usmonxon Alimov hazratlari Din ishlari bo'yicha qo'mita raisi Abdug'ofur Ahmedov bilan birga Tayloq tumanida yangi qurilgan “Madaniyat” jome masjidini ko'zdan kechirdilar.

Muftiy hazratlari jomedagi bunyodkorlik ishlari bilan yaqindan tanishish chog'ida masjid binosi go'zal naqqoshlik namunasi asosida bezatilgani, namozxonlar uchun tayyorlangan sharoitlar ko'ngilni xushnud qilishini ta'kidladilar.

Shundan so'ng mehmonlar Samarqand tumanidagi “Imomi A'zam” jome masjidiga tashrif buyurishdi. Muftiy hazrat jamoatga peshin namozini o'qib bergandan so'ng namozxonlarga ma'ruza qilib berdilar, ushbu masjid qiyomatga qadar mo'min-musulmonlarga xizmat qilishi va uning qurilishida jonbozlik ko'rsatayotgan saxovatpesha insonlarga yaxshiliklar so'rab duolar qildilar.

Ma'lumot uchun, 2020 yil boshida “Madaniyat” jome masjidi yangi binosi milliy va zamonaviy me'morchilik an'analariga to'la mos holda qayta qurilib namozxonlar ixtiyoriga topshirilgan edi.

Imomi A'zam masjid 1880-1890 yillarda qurilgan bo'lib, sobiq sho'rolar davrida turli maqsadlarda foydalangan. Jome binosi 1990-1991 yillar davomida qaytadan bunyod etilgan.

O'zbekiston musulmonlari idorasi matbuot xizmati