Avval xabar berilganidek, O‘zbekistondagi Islom sivilizatsiyasi markazining zamonaviy kutubxonasi kitobxonlar, tadqiqotchilar va talabalar uchun o‘z eshiklarini rasman ochdi. Axborot-kutubxona xizmatlaridan samarali foydalanish uchun quyidagi qoida va tartiblar belgilangan:

1. A’zo bo‘lish uchun kerakli hujjatlar 

Kutubxonadan foydalanish 14 yoshdan boshlab rasmiylashtiriladi. Ro‘yxatdan o‘tish uchun quyidagi hujjatlardan biri taqdim etilishi lozim:

• Pasport yoki ID-karta;

• Istiqomat qilish guvohnomasi;

• Haydovchilik guvohnomasi.

Eslatma: 14–16 yoshdagi foydalanuvchilar tug‘ilganlik haqidagi guvohnoma hamda ota-onasi yoki vasiylarining shaxsini tasdiqlovchi hujjatlari asosida a’zo bo‘lishlari mumkin.

Ro‘yxatdan o‘tgan kitobxonlarga 2 yil muddatga amal qiluvchi maxsus ID-karta taqdim etiladi. 
 

2. Ish tartibi va vaqti

Kutubxona haftaning quyidagi kunlarida foydalanuvchilarni qabul qiladi:

• Dushanba – Juma: 09:00 dan 22:00 gacha

• Shanba: 09:00 dan 18:00 gacha

• Yakshanba: Dam olish kuni

3. Kutubxona imkoniyatlari va fondlari

Markaz kutubxonasi bir vaqtning o‘zida 310 nafar kitobxonga xizmat ko‘rsatish salohiyatiga ega bo‘lib, quyidagi makonlarni o‘z ichiga oladi:

• Ilmiy va xorijiy adabiyotlar zallari hamda olimlar xonasi;

• Kovorking hududi va individual ishlash joylari;

• Imkoniyati cheklangan shaxslar uchun maxsus xona;

• Ochiq havoda mutolaa qilish uchun yashil maydon.

Kitobxonlar uchun kutubxonaning 40 mingdan ortiq bosma nashrlari, 3 mingdan ziyod nodir qo‘lyozma va toshbosma manbalari hamda mahalliy va xalqaro elektron bazalar orqali 10 milliondan ortiq raqamli resurslardan foydalanish imkoniyati yaratilgan.

Tadqiqotchilar uchun sensor panellar, infokiosklar, ovozdan xoli kabinalar va kitoblarni sterilizatsiya qilish uskunalari xizmat ko‘rsatmoqda. 

O‘zbekiston musulmonlari idorasi
Matbuot xizmati