Sayt test holatida ishlamoqda!
17 Avgust, 2025   |   23 Safar, 1447

Toshkent shahri
Tong
04:07
Quyosh
05:34
Peshin
12:32
Asr
17:18
Shom
19:23
Xufton
20:43
Bismillah
17 Avgust, 2025, 23 Safar, 1447

“Vaqf” xayriya jamoat fondi ko‘ngillarga shodlik ulashishda davom etadi

01.11.2018   4666   3 min.
“Vaqf” xayriya jamoat fondi ko‘ngillarga shodlik ulashishda davom etadi

Dinimizda insonlarga yaxshilik qilish, ularning ko‘nglini ko‘tarish ulkan savobli amallardan sanaladi.

Hadisi shariflardan birida “Farz amallardan keyin Alloh taologa eng mahbub amal musulmon kishining qalbiga shodlik kiritishdir” deyilgan.

Shu o‘rinda quyidagi rivoyatni eslash o‘rinli. Bir kuni Rasululloh sollallohu alayhi vasallam Oisha roziyallohu anhodan xursand bo‘lib: “Ey Oisha, mendan xohlagan narsangni so‘ra”, – dedilar. Oisha roziyallohu anho juda ham ziyrak ayol edilar, bu fursatni qo‘ldan boy bermaslik uchun eng yaxshi narsani so‘rashni qasd qildilar va: – “Bu borada otam bilan maslahatlashsam”, – dedilar.

Shunday qilib, Abu Bakr roziyallohu anhuning huzurlariga borib voqeani bayon qildilar. Abu Bakr roziyallohu anhu: “Rasululloh sollallohu alayhi vasallam me’rojga chiqqanlarida Alloh taolo u zotga sirlarni aytgan. O‘shalardan birini aytib berishlarini so‘ra”, – dedilar. Oisha onamiz roziyallohu anho o‘sha narsani so‘radilar. Rasululloh sollallohu alayhi vasallam:

– “Robbim menga me’roj kechasida: “Mening nazdimda mo‘minning darajasi shu darajada yuqoriki, qaysi bir mo‘min boshqa bir mo‘minning qalbiga xursandchilik solsa, albatta jannatiy bo‘ladi, dedi”, – dedilar.

Oisha roziyallohu anho xursand bo‘lib Abu Bakr Siddiq roziyallohu anhuga bu gapni yetkazgan vaqtlarida U zotning ko‘zlaridan yosh qalqidi. Bunga guvoh bo‘lib turgan Oisha roziyallohu anho: – “Nega yig‘laysiz otajon, axir bu xursandchilik xabar emasmi?”, dedilar. Abu Bakr: – “Bu, mo‘minning qalbi Alloh taoloning nazdida shu darajada qadrliki, kim unga ozor yetkazsa – do‘zaxiydir degani bo‘ladi» – deb javob qildilar.

Mazkur rivoyatdan bir insonni ko‘nglini ko‘tarish, uning qalbiga xursandchilik kiritish naqadar savobli, shu bilan birga e’tiborli ish ekani namoyon bo‘lmoqda.

Yurtboshimiz tashabbuslari bilan tashkil etilgan “Vaqf” xayriya jamoat fondi ham dinimizning yuqoridagi ko‘rsatmalariga sodiq qolib, joylarda insonlar holidan xabar olib, ularning qalbiga xursandchilik olib kirishga harakat qilmoqdalar.

Jumladan, “Vaqf” xayriya jamoat fondi tomonidan Toshkent shahar 7-sonli klinik shifoxonasiga 2 ta nogironlar aravachasi yetkazib berildi.

Kuz fasli ham o‘tib borib, kunlar soviy boshladi. Ha, qish eshik qoqmoqda. Sovuq ob-havoda kattalarku bir ilojini qilar, ammo bolalar shamollab qolishi, qiynalishi mumkin. Shuning uchun ularni qishki issiq kiyimlar bilan ta’minlash masalasi muhimdir.

“Vaqf” xayriya jamoat fondi tomonidan bu muammoni biroz yengillatish borasida bir qator amaliy ishlar qilib kelinmoqda.

Jumladan, Toshkent viloyati G‘azalkent tumanidagi 125-sonli ixtisoslashtirilgan imkoniyati cheklangan bolalar maktab-internatiga qishki issiq sport kostyumlari va anjomlari yetkazib berildi.

Bolalar ko‘zidagi quvonch, o‘ksik dillardagi surur, qalb to‘ridan otilib chiqqan duolar, Alloh nasib etsa, ijobat bo‘lajak va Fondning bu kabi muruvvat, oliyjanoblikka yo‘g‘rilgan ishlari yanada keng quloch yoyajak.

 

 O‘zbekiston musulmonlari idorasi Matbuot xizmati 

O'zbekiston yangiliklari
Boshqa maqolalar

Hamdardlik bildiramiz

16.08.2025   6688   1 min.
Hamdardlik bildiramiz

O‘zbekiston musulmonlari idorasi jamoasi Toshkent shahridagi "To‘ra Buva" jome masjidi imom-xatibi Umidjon domla Sodiqovning otalari Anvar hoji otaning vafoti munosabati bilan u kishining yaqinlariga chuqur ta’ziya izhor etadi.

Oxirat safariga kuzatilgan otaxon el koriga yaraydigan, dinu diyonat yo‘lida xizmat qiladigan farzand va nevaralarni o‘stirdilar, chiroyli tarbiya qildilar.

Alloh taolo marhum otaxonning barcha solih amallarini o‘zlariga hamroh aylab, O‘z mag‘firatiga olsin. Haq taolo marhum otaxonning yaqinlari, farzandu arjumandlariga chiroyli sabr berib, bu musibatlariga ajru mukofotlar ato etsin.

O‘zbekiston musulmonlari idorasi jamoasi, ulamolari, imom-domlalari va o‘qituvchi-mudarrislari nomidan Umidjon domla Sodiqovga, u kishining oila a’zolari, yor-birodarlari, yaqinlariga hamdardlik bildiramiz.

Innaa lillaahi va innaa ilayhi roji’uun.

«Musibat yetganda «Albatta, biz Allohnikimiz va albatta, biz Unga qaytuvchimiz», degan sabrlilarga xushxabar bering».

O‘zbekiston musulmonlari idorasi