Parvardigorimizga shukrki, yurtimizdagi tinchlik, omonlik hamda muqaddas dinimiz, bebaho qadriyatlarimizni asrab avaylashga bo‘lgan davlat darajasidagi e’tibor sabab, masjidlarimiz ko‘rkam qiyofa kasb etmoqda. Zero, bugungi kunda dunyoning ba’zi hududlarida inson nomiga munosib bo‘lmagan kimsalarning masjidlarga qilayotgan tajovuzlarini ko‘rib, bizning masjidlarimizdagi bunyodkorliklar uchun behad shukr qilamiz va Alloh taolodan dunyoga tinchlikni so‘raymiz.
Toshkent shahrining Fayziobod mahallasida joylashgan “Valixo‘ja o‘g‘li Norxo‘ja” jome masjidi dastlab 1962 yilda qurilgan. Sobiq ittifoq davrida masjid deyarli faoliyat yuritmagan. Mustaqilligimizning ilk yillari - 1991-1992 yillarda Fayziobod mahallasida istiqomat qilgan Valixo‘ja o‘g‘li Norxo‘ja hojining xayrli tashabbusi hamda mahalla ahli va faollari ishtirokida hashar yo‘li bilan qayta tiklanib, ta’mirlangan. 1997-yilda masjidga “Valixo‘ja o‘g‘li Norxo‘ja” jome masjidi nomi berilgan. 1999-yildan jome masjid sifatida faoliyat ko‘rsatmoqda.
O‘tgan davr mobaynida masjid binosi eskirganligi, bugunda ta’mirtalab holga kelib qolganligi tufayli mahlla ahli ezgu niyat bilan masjidni qayta qurish taklifini olg‘a surishdi.Va bu xayrli tashabbus qullab quvvatlangach shu yilning Avgust oyida qayta qurish ishlari boshlab yuborilgan edi.
Joriy yilning 2 dekabr kuni masjidining yangidan qurilishi rejalashtirilgan binosi uchun birinchi g‘isht qo‘yildi.
Ushbu tadbirda O‘zbekiston musulmonlari idorasi raisi, muftiy Usmonxon Alimov, mutasaddi tashkilotlar vakillari, masjid tashabbuskorlari va mahalla faollari qatnashdi. Ushbu xayrli Mavlid oyida amalga oshirilayotganligi ko‘ngillarni shod etdi. Nuroniy otalarimiz Vatan ravnaqi, yurt tinchligi, osmonimiz musoffaligi va masjidlarning obodoligini so‘rab duoi xayrlar qilishdi.

O‘MI matbuot xizmati