O‘zbekiston delegatsiyasi Parijda Islom sivilizatsiyasi markazi taqdimotiga tayyorgarlik ko‘rish jarayonida qator uchrashuvlarda ishtirok etdi, deb xabar bermoqda “Dunyo” AA.

Ushbu uchrashuvlar O‘zbekistonning YUNЕSKOdagi doimiy vakolatxonasi ko‘magida tashkil etildi. Taqdimotning o‘tkazilishi O‘zbekiston Prezidenti tashabbusi bo‘lib, xalqaro hamjamiyatni mamlakatning ilmiy va madaniy merosi, shuningdek, yurtimizda amalga oshirilayotgan diniy-ma’rifiy islohotlar bilan tanishtirishga qaratilgan.

YUNЕSKO, Islom hamkorlik tashkiloti (IHT) va Islom dunyosi ta’lim, fan va madaniyat tashkiloti (ICESCO) vakillari bilan bo‘lib o‘tgan uchrashuvlarda xalqaro konferensiya va ko‘rgazmalar konsepsiyasi taqdim etildi.

YUNЕSKO Ijro etuvchi apparati rahbari Mariagratsiya Skvichcharini O‘zbekiston yetakchisining ushbu tashabbusini e’tirof etib, uning xalqlar o‘rtasidagi muloqotni mustahkamlashda muhim ahamiyat kasb etishi aytdi.

YUNЕSKOning “Ipak yo‘llari” dasturi rahbari Mehrdad Shabaxang O‘zbekiston va Markaziy Osiyoning Sharq va G‘arb o‘rtasida madaniy aloqalarni rivojlantirishdagi roli haqida to‘xtalib, bu borada konferensiya va ko‘rgazmani tayyorlash uchun dastur materiallarini taqdim etishini qayd etdi.

IHTning YUNЕSKOdagi vakili Salima Delibey diniy-ma’rifiy sohadagi islohotlar, Islom sivilizatsiyasi markazi hamda xalqaro ilmiy-tadqiqot markazlari faoliyatini yuqori baholab, o‘tkaziladigan tadbirlarni doim qo‘llab-quvvatlashini ma’lum qildi.

ICESCOning YUNЕSKO huzuridagi doimiy kuzatuvchisi Somiya Jakta O‘zbekistonning ilmiy va madaniy merosining xalqaro hamjamiyat uchun ahamiyatini ta’kidlab, tashkilot konferensiya va ko‘rgazmani tayyorlashda ishtirok etishini ta’kidladi.

Uchrashuvlar yakunida YUNЕSKO, IHT va ICESCO vakillari O‘zbekiston tashabbusini qo‘llab-quvvatlashini hamda yuqori xalqaro darajadagi tadbirlarni o‘tkazishga ko‘maklashishga tayyor ekanini bildirdi.

O‘zbekiston musulmonlari idorasi Matbuot xizmati