1 qism / 2 qism

Ular: “Ho'p yaxshi. Demak, to'rt imomlarning barchasi to'g'ri ekan, bordiyu to'rt imomdan uchtasi bir xil fikrda bo'lishsa-yu, lekin bittasi boshqa fikrda bo'lsa, ulardan qaysi biriga ergashamiz?” deb yana so'radilar.

Men: “Bir imomga”, deb javob berdim.

Ular: “Nima uchun, axir ko'pchilikka ergashish kerak emasmi?”, deyishdi.

Men: “Alloh taolo 124 ming payg'ambarlarini yubordi. Ularning adadini Alloh taoloning O'zi biladi. Biz barchalariga iymon keltiramiz.

Qur'oni karimda Yusuf alayhissalomga akalari sajda qilganlari haqida oyat kelgan. Ulamolar ushbu oyatning tafsirida: “Insonlarning bir-biriga hurmat ma'nosida sajda qilishi Rasululloh sollallohu alayhi vasallamgacha o'tgan barcha payg'ambarlar davrida ruxsat etilgan”, deydilar. Ammo Payg'ambarimiz alayhissalom bizni bunday qilishdan qaytarganlar. Lekin o'tgan 123 ming 999 nafar payg'ambar bundan qaytarishmagan. Siz o'tgan payg'ambarlarga ergashasizmi yoki oxirgi zamon payg'ambari Rasululloh sollallohu alayhi vasallamgami?” deb so'radim.

Ular: “Rasululloh sollallohu alayhi vasallamga ergashamiz”, dedilar.

Men: “Huddi shuningdek biz ham bir imomga ergashamiz”, dedim.

Ular: “Islom dini Makka, Madinada nozil bo'lganmi yoki Kufadami?”, deb yana savol so'radilar.

Men: “Makka, Madinada”, dedim.

Ular: “Unda Kufadagi Abu Hanifaga ergashmasdan, Makka, Madinadagi imomlarga ergashimiz kerak emasmi?” dedilar.

Men: “To'g'ri, Qur'oni karim oyatlari Makka va Madinada nozil bo'ldi. Lekin etti qorilardan biri Makkalik, boshqasi Madinalik, yana biri Basralik bo'lgan. Sizlar ham kufalik Imom Osimning qiroatiga ergashasizlarku. Nega unda Qur'on Makka, Madinada nozil bo'lgan bo'lsa, kufalik qorining qiroatiga ergashyapsizlar?” deb savollariga savol bilan javob berdim.

Ular: “Chunki kufalik qorilar Qur'onni o'zlari o'ylab topishmagan. Ular kufaga Makka, Madinadan borgan ko'plab sahobalardan ta'lim olishgan. Sahobalar ularga Qur'onni o'rgatishgan”, dedilar.

Men: “Sahobalar Kufaga kelishganida ibodatlarni ham o'rgatishganmi? Hususan, qanday namoz o'qishni ham ko'rsatib berishganmi? Nima deb o'ylaysiz?” deb so'radim.

Ular: “Ha, sahobalar qanday namoz o'qishgan bo'lsa, uni kufa ahliga ham o'rgatishgan”, deyishdi.

Men: “Demak, sahobalar Qur'ondan ta'lim berishgan ekan, albatta namozni ham o'rgatganlar. Demak, bir mazhabga ergashsak sahobaga ergashayotgan bo'lamiz. Sahobalardan ko'ra Rasululloh sollallohu alayhi vasallamga ergashishda kim go'zalroq namuna bo'lishi mumkin?” dedim.

Hulosa o'zingizdan.......

Davron NURMUHAMMAD