Inson qadri va manfaati yo‘lida
O‘zbekiston musulmonlari idorasida fuqarolar bilan ochiq muloqotni mustahkamlash va ularning muammolariga yechim topish maqsadida navbatdagi qabul bo‘lib o‘tdi.
Diniy idora raisi o‘rinbosari Zayniddin domla Eshonqulov ishtirokida o‘tkazilgan tadbirda yurtimizning turli joylaridan kelgan hamyurtlarimizning murojaatlari tinglandi.
Tadbir davomida fuqarolar tomonidan haj, oilaviy munosabatlar, xayriya, ijtimoiy ko‘mak kabi masalalarda samimiy muloqot qilinib, ularni qiziqtirgan savollar yuzasidan amaldagi tartib-qoidalar doirasida atroflicha tushuntirish va huquqiy tavsiyalar berildi.
Murojaatlarning aksari bevosita qabul jarayonida ijobiy yechim topdi. Qo‘shimcha o‘rganish va vaqt talab etadiganlari tegishli bo‘lim va mas’ullarga yo‘naltirilib, nazoratga olindi.
Bu kabi xayrli ishlar aholining diniy-ma’rifiy ehtiyojlariga javob berish barobarida, yurtdoshlarimizning roziligiga erishish, inson qadrini ulug‘lash yo‘lidagi amaliy qadamlardan biri bo‘lmoqda.
O‘zbekiston musulmonlari idorasi
Matbuot xizmati
Muftiy hazrat anjumanda oila mustahkamligi va farzand tarbiyasiga oid muhim tashabbuslarni ilgari surdilar
Qohira shahrida bo‘lib o‘tayotgan anjuman asosiy qismida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar. Shuningdek, Misr muftiysi Nazir Muhammad Ayyod, Misr Vaqflar vaziri Usoma Azhariy, Xalqaro Islom fiqhi akademiyasi bosh kotibi doktor Qutb Mustafo Sano, Al-Azhar shayxi vakili Shayx Ayman Abdulg‘aniy, Musulmon olami uyushmasi Bosh kotibi o‘rinbosari doktor Abdurrahmon ibn Abdulloh az-Zayd va Abu-Dabi Islom ishlari raisi, doktor Umar Habtur ad-Dari’iy kabilar nutq qildilar.
Muftiy hazratlari muhokama qilinayotgan oila, ayollar huquqi va farzand tarbiyasi masalasi g‘oyat dolzarb ekaniga urg‘u qaratdilar. Xususan, turli mintaqalarda oila instituti inqirozga yuz tutayotgani, yoshlarning oila qurishga qiziqishi pasayib, ajrashishlar soni ortib borayotgani jiddiy xavotir uyg‘otayotgani ta’kidlandi. Qayd etilishicha, bu sinov butun insoniyat oldida turgan umumbashariy muammoga aylanmoqda.
Shu munosabat bilan Muftiy hazratlari tomonidan bir qator dolzarb takliflar ilgari surildi:
– Qo‘shma fatvo ishlab chiqish: ilmiy asoslangan hamda ilg‘or tajribalarni o‘zida jamlagan qo‘shma fatvo ishlab chiqish zarurligi ma’lum qilindi. Ushbu hujjatni turli tillarga tarjima qilib, OAV, raqamli platformalar, ma’rifiy tadbirlar va juma xutbalari orqali keng jamoatchilikka yetkazish ta’kidlandi.
– Yoshlarni oilaga tayyorlash dasturlari: turmush qurish ostonasida turgan yoshlarning diniy, milliy va ijtimoiy mas’uliyatini yuksaltirishga qaratilgan maxsus kurslar va psixologik-ma’rifiy maslahat dasturlarini yo‘lga qo‘yish taklif etildi.
– Fatvo markazlari va OAV hamkorligi: milliy qadriyatlar va islomiy ta’limotlarni yoshlarga zamonaviy, ta’sirchan usullarda yetkazish uchun fatvo markazlari bilan OAV o‘rtasidagi hamkorlik lozimligiga e’tibor qaratildi.
Shu o‘rinda, O‘zbekistonda mazkur yo‘nalishlarda amalga oshirilayotgan tizimli islohotlar ham bayon qilindi.
Xalqaro anjuman ishtirokchilari Muftiy hazratlari tomonidan ilgari surilgan takliflarni qo‘llab-quvvatlab, yurtimizda diniy-ma’rifiy sohada amalga oshirilayotgan islohotlar, oila institutini mustahkamlash borasidagi ishlarga yuqori baho berdilar.
O‘zbekiston musulmonlari idorasi Matbuot xizmati
- «
- »