9 may – Hotira va qadrlash kuni umumxalq bayrami mustaqil O'zbekistonda asrlar davomida qahramona, vatanimizni himoya qilgan, uning erkinligi, mustaqilligi va xalqining tinchligi uchun kurashgan vatandoshlar xotirasiga bag'ishlangan. O'tganlarning nomlarini yod etish, xotirasini hurmat bilan eslash, ularning ruhlarini shod qilish muqaddas odat sifatida qon-qonimizga singib ketgan.

O'tganlar ruhini yod etish, tiriklarga mehr-oqibat ko'rsatish qadriyat, qolaversa, har bir kishining insoniylik burchi sanaladi. Mana shu ezgu fazilatlar «Hotira va qadrlash» kuni munosabati bilan yanada yorqin namoyon bo'ladi.

Aziz va mukarram inson zotining yoshi xam, keksasi xam, ayoli xam, erkagi xam birdek qadr-qimmatga egadir. Muqaddas Islom dini inson kadrini shu darajada yuqori ko'targanki hatto, uning tirigi bilan o'ligining hurmati birdek qadrlanadi. Dunyodan utib ketgan marhum yaqinlarimizni doimo yaxshi sifatlar bilan eslash xam insoniylik burchimizdir. Bu xakida muborak hadisi sharifda Payg'ambarimiz Muhammad alayhissalom “Dunyodan utganlarning yaxshi sifatlarini eslanglar, ularning yomon sifatlarini aytishdan saqlaninglar” deganlar. (Termiziy rivoyati)

Biz utganlarni maxsus bir kunda, ayni 9 mayda xotirlashimiz ramziy ma'noda bo'lib, aslida har doim har lahzada ularni eslab duolar qilamiz, ularning hayot yo'llarini o'rganib ulardan namunalar olamiz. Shuningdek, kelajak avlod bo'lmish farzandlarimizga xam utgan ajdodlarimizning hayoti biz uchun ulkan namuna ekanini uqtirib kelamiz. Ularning yaxshiliklarini hamisha xar doim yodda tutamiz. Zero,tarixiy xotirasiz kelajak yo'q, deb bejizga aytilmagan. Hotira va qadrlash degan gaplar bir kunlik an'anaga bog'lanib qolmasligi kerak. Vatan, millat, din yo'lida jon fido qilgan ajdodlarimiz xotirasi bizlar uchun qanchalik ardoqli va muqaddas bo'lsa, keksalik yoshiga etgan ulug'larimizning kadriga etish, hurmatlarini joyiga kuyish xam shunchalik muhimdir.

Aynan o'tganlarni yodlash asnosida yana bir muhim ish – insonni tirikligida, ko'zi ochiqligida qadrlash, e'zozlashdir.

Do'stlar, yaxshilarni avaylab saqlang,

Salom degan so'zning salmog'in oqlang.

O'lganda yuz soat yig'lab turgandan,

Uni tirigida bir soat yo'qlang.

deb bejiz aytilmagan.

Bu kunlarda qilinadigan xayrli ishlardan biri yoshi ulug' kishilarning x,olidan xabar olishimiz, ularning qalblariga xursandlik kiritishimizdir. Bu haqda Payg'ambarimiz Muhammad alayhissalom hadisi sharifda shunday deganlar: “Kichigimizga rahm qilmagan va kattalarimizning kadriga etmagan kimsa bizdan emasdir”. (Abu Dovud va Termiziy rivoyati)

Davlatimiz doimo urush qatnashchilari keksa yoshdagi otaxonlarimiz, onaxonlarimiz va barcha nafaqaxo'rlarga katta diqqat e'tibor bilan g'amxo'rlik qilib kelmoqda. Yaratgandan barcha marhum ajdodlarimizni Uzining rahmatiga olib ularning haqlariga qilayotgan duolarimizni qabul qilib, oramizda hayot qolganlariga farovon hayot tinchlik va ofiyat berishini so'rab qolamiz.  Vatanini himoya qilishda jonini fido qilgan, xalq orzu qilgan erkinlik uchun kurashgan milliy qahramonlarimizni ruhlari shod oxiratlari obod bo'lsin.

Yangiyo'l tumani “Imom Sulton” jome masjidi

imom xatibi Odiljon Narzullayev