Hukumat qarori bilan buyuk tabib va qomusiy olim Abu Ali ibn Sinoning boy ilmiy merosini chuqur o‘rganish, asarlarini keng targ‘ib qilish hamda uning jahon ilm-fani rivojiga qo‘shgan hissasini yanada keng namoyon etish bo‘yicha 2030 yilgacha mo‘ljallangan «yo‘l xaritasi» tasdiqlandi.

Hujjat doirasida 2030 yilda nishonlanadigan alloma tavalludining 1050 yilligiga tayyorgarlik ko‘rish, xalqaro ilmiy hamkorlikni mustahkamlash va Ibn Sino merosini zamonaviy tadqiqotlar asosida o‘rganishga qaratilgan qator muhim vazifalar belgilandi, xabar bermoqda iccu.uz.

Jumladan, 2026 yil oktyabr oyida Toshkent shahrida «Ibn Sino — G‘arb va Sharq falsafiy tafakkurining buyuk namoyandasi» mavzusida xalqaro ilmiy konferensiya o‘tkazish, oliy tibbiy ta’lim muassasalari, ilmiy markazlar, kutubxonalar va davolash-profilaktika muassasalarida ilmiy-amaliy anjumanlar, ko‘rgazmalar hamda ochiq ma’ruzalar tashkil etish rejalashtirilgan.

Shuningdek, xorijiy mamlakatlarda ilmiy ekspeditsiyalar o‘tkazish, allomaning chet ellarda saqlanayotgan qo‘lyozmalarini jamlash, «Mo‘jaz al-Qonun», «Qonuncha», «Al-Ishorot va at-tanbihot», «Donishnoma», «Kitob ash-Shifo» va «Sharq falsafasi» kabi asarlarini o‘zbek tiliga tarjima qilish, ularning bosma va elektron nashrlarini tayyorlash hamda «Ibn Sino» xalqaro mukofotini ta’sis etish nazarda tutilgan.

Qarorga muvofiq, Buxoro davlat tibbiyot instituti huzurida davlat muassasasi shaklida Abu Ali ibn Sino ilmiy-tadqiqot markazini tashkil etish to‘g‘risidagi taklif ham ma’qullandi. Markazning asosiy vazifalari Ibn Sino tibbiy merosini o‘rganish, tadqiqot natijalarini zamonaviy tabobatda qo‘llash, qo‘lyozmalarni jamlash va tarjima qilish, ularning elektron platformasini yaratish, shuningdek, tibbiyot xodimlari hamda tibbiyot tarixi bilan qiziquvchilar uchun o‘quv kurslari va mahorat darslarini tashkil etishdan iborat.

Mazkur tashabbuslar buyuk allomaning boy ilmiy merosini asrab-avaylash, uning jahon sivilizatsiyasi va tibbiyot taraqqiyotiga qo‘shgan ulkan hissasini yanada chuqur o‘rganish hamda kelajak avlodlarga yetkazishda muhim ahamiyat kasb etadi.

O‘zbekiston musulmonlari idorasi Matbuot xizmati