Praga shahrida O‘zbekistonning Chexiyadagi elchixonasi tashabbusi bilan qator ma’naviy-ma’rifiy uchrashuvlar va iftorlik tadbirlari tashkil etilmoqda. Minglab vatandoshlarimizni qamrab olayotgan xayrli tadbirlar “Ramazon – mehr-muruvvat va hamjihatlik oyi” g‘oyasi asosida o‘tkazilib, xorijdagi yurtdoshlarimizni birlashtirmoqda.
Pragadagi O‘zbekiston talabalari assotsiatsiyasida o‘tkazilgan uchrashuvda yuzdan ortiq vatandoshimiz ishtirok etdi. Suhbat davomida O‘zbekistondan borgan imomlar yoshlarning ta’limga mas’uliyat bilan yondashishi, qonunlarga rioya qilishi, shuningdek, o‘qish jarayoniga salbiy ta’sir ko‘rsatishi mumkin bo‘lgan omillardan ehtiyot bo‘lishi lozimligi haqida ma’ruzalar qilishdi. Shu bilan birga, Chexiya migratsiya qonunchiligi talablariga amal qilish masalalariga alohida urg‘u berildi.
“Turkiston” madaniy markazida ham vatandoshlar bilan muloqot tashkil etildi. Unda yuzlab ishtirokchilar qatnashib, Ramazon oyining mazmun-mohiyati, shaxsiy intizom va mas’uliyat, jamiyatda bag‘rikenglik muhitini mustahkamlash kabi masalalar xususida ma’ruza tinglandi.
Yurtimiz ulamolari, shuningdek, Tesla kompaniyasining Pragadagi qurilish obyektida mehnat qilayotgan vatandoshlar bilan ham uchrashdi.
“Sulaymon” turk madaniy markazida iftorlik dasturxoni yozildi. Iftorlikdan keyin taroveh namozi ado etildi. Dinning mo‘tadil va an’anaviy qadriyatlarini asrash, turli radikal g‘oyalardan ogoh bo‘lish mavzusida suhbat qilindi.
Har kuni davom etayotgan mazkur xayrli tashabbuslar chet elda tahsil olayotgan yoshlar va mehnat qilayotgan yurtdoshlar o‘rtasida o‘zaro hurmat va hamkorlik muhitini mustahkamlash, milliy va ma’naviy qadriyatlarni asrab-avaylashga targ‘ib etishi bilan ahamiyatlidir.
O‘zbekiston musulmonlari idorasi
Matbuot xizmati
Xorijda istiqomat qilayotgan hamyurtlarimizning diniy savol-javoblarga bo‘lgan ehtiyojlarini yengillashtirish maqsadida O‘zbekiston musulmonlari idorasi Fatvo markazi tomonidan masofaviy murojaat xizmati yanada takomillashtirildi.
Endilikda musofirdagi vatandoshlarimiz uchun maxsus @fatvouz_musofir_bot telegram boti ishga tushirildi!
Aqlli qidiruv: Savolingizni yozing — bot boy fatvolar bazasidan sizni qiziqtirgan savolga zudlik bilan javob topib beradi.
Yozma murojaat: Agar bazadan kerakli javob topilmasa, savolingizni ulamolarga yozma ravishda yuborib, tez va mufassal javob olishingiz mumkin.
Parda ortidagi muloqot: Zarurat tug‘ilganda, Fatvo markazi mutaxassislari bilan bevosita qo‘ng‘iroq orqali bog‘lanish imkoniyati mavjud.
Musofir yurtdoshlarimiz uchun ishonchli diniy manba:
Do‘stlaringiz va yaqinlaringizga ham ulashing!
O‘zbekiston musulmonlari idorasi
Matbuot xizmati